Сынтәа Аҟәа ақалақь амш азгәарҭоит асабша ԥхынгәы 8 рзы, аҳҭнықалақь 2507 шықәса ахыҵуеит.
Аныҳәа иаҳа инарҭбааны иазгәаҭахоит сынтәа. Ԥхынгәы 7 рзы Москвеи Аҟәеи аусеицуразы амеморандум рыбжьарҵоит, имҩаԥгахоит анапаҵаҩра. Ԥхынгәы 7 инаркны 9-нӡа ақалақь амш азгәаҭара иазку ауснагӡатәқәа еиҿкаахоит. Сынтәа урҭ егьырҭ ашықәсқәа ирҿырԥшны иаҳа илахҿыхны, инарҭбааны иазгәаҭахоит, Аҟәа аиашьара зыбжьоу Урыстәыла ақалақьқәа жәпакы рҟынтә асасцәа аауеит ҳәа адырра ҟалҵеит Аҟәа ақалақь ахадара акультура аусбарҭа аиҳабы Наала Ҳашыгԥҳа.
Аныҳәа актәи амш азы Аҟәа агәашьаркыраҟны ахәылбыҽха асааҭ 7 рзы имҩаԥысуеит ашәаҳәаҩцәа Анна Семенович, Дмитри Маликов, Дариа Антониук рықәгылара.
Наала Ҳашыгԥҳа инарҭбааны дазааҭгылеит аҳҭнықалақь амш азгәаҭара ахьымҩаԥысуа аҭыԥқәа рҿы аҽазыҟаҵарақәа шцо. Аҟәа Аԥсны ахада иусбарҭа азааигәа ихыз аӷәтәы цҳа маҷ ҩаԥхьа еиҭашьақәыргылоуп, уи азааигәа амҩахәасҭақәа рылгара иаҿуп, уа еиҿыркаауеит "Аҟәа ашҭа" ҳәа зыхьӡхо аҭыԥ. Аԥсуа ибзазаратә ԥсҭазаашьа зныԥшуа акәакьқәа, амилаҭтә чысқәа, ахәмаррақәа, афольклортә шәақәа уҳәа рыла апрограмма еиҿкаахоит аныҳәа азгәаҭаразы амшын аԥшаҳәаҿы иалху аҭыԥ аҟны.
Убасгьы амза 9 рзы аҳҭнықалақь амш азгәаҭараан ҩ-сааҭк инарзынаԥшуа аконцерт мҩаԥысуеит.
Ақәа ақалақь амш азгәаҭара иазку аныҳәатә программа атәы инеиҵыхны ишәаҳар шәылшоит аудиофаил аҟны хыхь.