АҞӘА, ԥхынгәы 7 – Sputnik, Бадраҟ Аҩӡба. Амедал "Абзиабареи агәреибагареи рзы" аҭаацәарақәа ранашьара мҩаԥысит Аԥсны иҟоу Урыстәыла ацҳаражәҳәарҭаҟны аныҳәа аламҭалаз.
"Сгәанала, абзиабареи агәреибагареи Рымш ганкахьала иҳалалуп, даҽа ганкахьала ицқьоуп, даҽа ганкахьалагьы ҩыџьа заҵәык ирныҳәоуп. Раԥхьа иргыланы акраамҭа зыԥсҭазаара еицызхызгаз рзы. Ари акраҵанакуеит. Аиҳаракгьы Аԥсны, ауаҩԥсы иреиӷьу иҟазшьақәа аблаҷыц еиԥш иахьырыхьчо", - иҳәеит Аԥсны иҟоу Россотрудничество ахада Дмитри Федотов.
Аҭаацәа раԥҵара, реиқәырхара, ҳаҭырла азныҟәара ирымоу аҵакы азгәеиҭеит Аԥсны аиашахаҵаратә уахәама ахада Виссарион Аԥлиа.
"Ауаҩ бзиа иԥсҭазааратә мҩаҿы аԥҳәыс бзиа данинасыԥхо – ныҳәа дууп. Ари аҩыза аҭаацәараҿы ииуеит ахшара бзиа. Анцәа иҳәааит, аҳамҭақәа занашьахо аҭаацәарақәа атәыла аҩнуҵҟеиԥш анҭыҵгьы иҿырԥшыгахарц", - ҳәа азгәеиҭеит Аԥлиа.
Агәаларшәагатә медалқәеи ашәҟәыбӷьыцқәеи ранаршьеит Константини Иринеи Думаа, Геворки Варсени Гаранианаа, Константини Наталиеи Еидисаа.
День семьи в Посольстве России
© Sputnik / Томас Тхайцук
Амедал "Абзиабареи агәреибагареи рзы" – уаажәларратә ҳамҭоуп, Урыстәыла ахада Владимир Путин иусԥҟала ишьақәырӷәӷәоуп. Уи хықәкыс иамоуп иреиӷьӡоу аҭаацәаратә традициақәа, ахшара доуҳа ҳаракыла рааӡара уҳәа реиқәырхара.
Аԥҟара инақәыршәаны, амедал ранаршьоит Урыстәыла атәылауаа, аҳәаанырцә тәылақәа ртәылауаа - 25 шықәса еиҵамкәа аҭаацәара аԥҵаны измоу, излагылоу ауаажәларраҿы зыхьӡ-зыԥша ыҟоу, аҭаацәара абзиабареи агәреибагареи ҵаҵӷәыс иаҭаны измоу, зыхшара ауаажәларра рыгәҭа ҳаҭыр рықәны рааӡара зылшаз.