Ауаажәларратә палатаҿы Аԥсны ахада Аслан Бжьаниа далахәны имҩаԥысыз аиԥылараҿы иалацәажәан аԥсуа бызшәеи, адемографиеи, аекономикеи ирыдҳәалоу азҵаарақәа. Иара убас иазааҭгылан апартаментқәеи Гал араион анхацәа атәылауашәҟәы рыҭареи рызҵаатәы. Ауаажәларратә палата алахәыла Давид Ԥлиа арадио Sputnik аефир аҿы арҭ азҵаарақәа рганахьала ихатә гәаанагара иҳәеит.
Абызшәа апроблема далацәажәо, Давид Ԥлиа иҳәеит уи ԥхьаҟа аиԥыларақәа рҿы хазы игоу зҵаараны ишахәаԥшло, избанзар иамҽханакуа ауадаҩрақәа рацәоуп. Ауаажәларратә палата алахәыла игәаанагарала, иҟоу апроблемақәа зегьы иаартны иҳәатәуп, ажәлар еилыркаартә еиԥш.
Давид Ԥлиа иажәақәа рыла, апартамент азҵаара мыцхәы аполитикатә ԥшра аҭахеит. Иара иҳәеит ари аус аганахьала Ауаажәларратә палатаҟынтә ишышьҭаз ашәҟәы, агәҭынчымра цәырызгаз азҵаатәқәа зныз. Ауаажәларратә алахәыла иара убасгьы далацәажәеит Самырзаҟан инхо ауаа атәылауаҩшәҟәы рыҭара азҵаара.
Иаҳа инарҭбааны аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.