АҞӘА, ԥхынгәы 8 – Sputnik, Бадри Есиава. Цандрыԥшь амцарцәара-еиқәырхаратә станциа ҿыц аусура иаладыргеит ԥхынгәы 7 рзы. Абри атәы Sputnik акорреспондент изеиҭеиҳәеит Гагра араион амцарцәара-еиқәырхаратә отриад аиҳабы Давид Бганба.
"Уаанӡа амцарцәара-еиқәырхаратә отриад ҳара иҳаҵанамкуаз ахыбра иҩнан. Уажәы ҳхатә хыбра ҳауит. Ари аусуратә лҵшәақәа еиӷьнатәуеит. Астанциа 12-ҩык акуеит. ԥшьҩы-ԥышьҩыла иҷаԥшьалоит", - ҳәа иҳәеит Бганба.
Цандрыԥшь амцарцәара-еиқәырхаратә станциа аргылара иалагеит 2022 шықәса анҵәамҭазы. Аҭыԥ алхын аиқәырхаҩцәа ишалшо ала ашәарҭара ахьыҟоу аҭыԥ ахь ирласны анеира рылшартә аиԥш.
"Ари еихагылак змоу хыброуп, уи аҩнуҵҟа иҟоуп иҷыдоу атехника ахьыҩнадыргыло абоксқәа ҩба, аԥсшьарҭа, унапы ӡык ахьақәуҭәаша ауада, акрыфарҭа, аҵара ахьырҵаша акласс, аҟарул аиҳабы иуада, абылраҽацәыхьчаратә хәҭа аиҳабы, адиспетчертә уада, адиспетчер иԥсшьарҭа уада, ашьҭаҵарҭа", - иҳәеит Бганба.
Ахыбра азеиԥш ҵакыра 324 метр ԥшьыркца иҟоуп иҳәеит Бганба, иагьазгәеиҭеит уи шдыргыло Аԥсны АҶ рминистрреи Гагра араион ахадареи рыцхыраарала, аҭыԥантәи аусдкылаҩцәа рыдгыларала. Апроект азеиԥш хәыԥса 15 миллион мааҭ иҟоуп.