АҞӘА, ԥхынгәы 9 - Sputnik. Гагра араион иатәу АҶА амцарцәара-еиқәырхаратә маҵзура аусзуҩцәа зегьы дәықәҵоуп иахатәи аҵх азы ақәаршҩы иауыз ахҟьаԥҟьақәа аԥыхразы. Абри атәы аанацҳауеит аусбарҭа апресс-маҵзура.
АҶА адырраҭарала, Гагра араион аҟны анхарҭа ҩнқәа аӡы рыҵалеит, амҩадуқәа аӡы рнылеит. Иҟоу аԥхасҭа макьана еилкааӡам.
Гагра араион Лӡаа ақыҭан аҩнқәа актәи аихагылақәа аӡы рыҩналеит.
Аԥсны егьырҭ араионқәа рыҟны аҭагылазаашьа ҭышәантәалоуп.
Гагра араион аҿы рашәарамза аҩшамҭаз ақәаршҩы ӷәӷәа илеиз аӡымҭҟьар аанагеит. Уи иахҟьаны ареспубликатә мҩадуи аихамҩеи ԥҽит, сасааирҭак иатәыз азеиԥшынхарҭа ықәхны иагеит, аҩнқәа еиланажьит.