Ажәытә қалақь Гиуенос иахьатәи Очамчыра 2523 шықәса ахыҵра азгәарҭоит ԥхынгәы 15 рзы. Ақалақьи араиони рҟны ас еиԥш аныҳәа раԥхьа иазгәаҭан ԥхынгәы 9 2022 шықәсазы. Очамчыра амш азгәаҭара аламҭалаз, ақалақь иаланхо ауаа алархәны арыцқьаратә усқәа мҩаԥган.
Асааҭ 11 рзы аԥсадгьыл ахьчараз 1992-1993 шықәсқәа раан иҭахаз рбаҟа амҵан ашәҭқәа шьҭаҵахоит. Аныҳәа аартра мҩаԥгахоит асааҭ 12 рзы амшын аԥшаҳәаҟны. Араион аҟазацәа, асахьаҭыхыҩцәа рцәыргақәҵа еиҿкаахоит, убасгьы аныҳәатә концерт мҩаԥысуеит. Асааҭ 13 рзы иаартхоит асахьаҭыхҩы, аскульптор Ген Ерген иаԥиҵаз "Амшынҳәа аԥсҿыхҩы" захьӡу искульптура аҵла иқәҟаҵоу. Аныҳәа иаҭаауа убасгьы амузыкатә феиерверк рзеиҿкаахоит.
"Иахьынӡаҳалшо ауаа рырлаҿыхразы аҭагылазаашьа аԥаҳҵоит ҳәа сгәы иаангоит", - лҳәеит Бласкьырԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.