АҞӘА, ԥхынҷкәын 17 – Sputnik, Асмаҭ Ҵәыџьԥҳа. 2023 шықәса актәи азбжазы Гал араион аҿы 20 цәгьоура аарԥшуп ҳәа еиҭеиҳәеит Гал араион аҩнуҵҟатәи аусқәа русбарҭа аиҳабы Беслан Жьваниа араион ахадараҿы Аслан Бжьаниа имҩаԥигоз аилацәажәараҟны.
Зынӡа 25 цәгьоура аҭыԥ рыман – аӷьычрақәа ԥшьба, ауаҩшьра аҽазышәарақәа ҩба, закәаншьаҭада абџьар аикәыршара. Ацәгьоурақәа раарԥшра 80% инаӡоит.
Аҳасабырбатә аамҭазы ацәгьоура хьанҭақәа ааба азгәаҭан, хԥа аарԥшуп иҳәеит Жьваниа.
Амҩаҿ акәзар, 2023 шықәсазы Гал араион аҟны авариақәа хәба аҭыԥ рыман. Ааха роуит ԥшьҩык. Зынӡа иаарԥшын амҩатә ԥҟарақәа реилагарақәа 2083.
Аԥҟарақәа реилагаразы хараԥса ҳасабла еизгоуп 1,3 миллион мааҭ.