АҞӘА, ԥхынгәы 17 - Sputnik. Аԥсны адәныҟатәи аусқәа рминистр Инал Арӡынба диԥылеит амузыкатә менеџьер, акультуратә центр "Сириус" асахьаркыратә напхгаҩы Ханс-Иоахим Фраи ҳәа аанацҳауеит Аԥсны ААР Амедиацентр.
"Аԥсны Аҳәынҭқарраҿы аҵакы аманы иахәаԥшуеит ҳпартниорцәеи ҳареи ҳусеицура, аиҳаракгьы Урыстәылатәи Афедерациа аус ацура. Ҳара уаанӡа ҳалацәажәахьан, хра шамоугьы азгәаҳҭахьан Аԥсны иадҳәалоу ауснагӡатәқәа "Сириус" аҿы рымҩаԥгара", - ҳәа иҳәеит Арӡынба.
Ханс-Иоахим Фраи иҳәеит ареспублика алшара дуқәа аманы ишибо, урҭ рырҿиара шаҭаху.
"Шәтәыла аус ацура сара сзы игәахәароуп. Иаԥҵалатәуп акультуратә цҳақәа. Урҭ Аԥсны акультуратә, аекономикатә, агуманитартә ҿиарахь икылыргоит", – иҳәеит иара.