АҞӘА, ԥхынгәы 20 - Sputnik. Аҩнуҵҟатәи аусқәа рминистрра аусзуҩцәа Урыстәыла атәылауаҩԥҳәыс 66 грамм инеиҳаны анаркотикатә маҭәашьар аметадон лымырхит ҳәа аанацҳауеит аусбарҭа апресс-маҵзура.
Аҟәа ақалақь ААР аиҳабы Баҭал Ломиа иажәақәа рыла, 35 шықәса зхыҵуа Софиа Каплева Аҟәа, Папасқьыр имҩаҿы дааныркылеит, амилициа аҟәшахьы днаргеит.
Дангәарҭоз, илыдырбалеит 158 еилаҳәара аметадон.
"Анаҩстәи аоперативтә уснагӡатәқәа раан Каплева аҭыԥ маӡақәа ҳлырбеит, анаркотикқәа ахьылҵәахуаз", - иҳәеит иара.
Ломиа иара убасгьы еиҭеиҳәеит лара аамҭала дахьынхоз аҩнаҿы даҽа 10 еилаҳәарак анаркотикқәа шырыԥшааз.
Софиа Каплева ауаҩы аамҭалатәи аанкыларҭахь днагоуп. Закәаншьаҭада анаркотикқәа рыҭиреи, раахәареи, рымазаареи аганахьала аусҭҵаарақәа мҩаԥысуеит.