Адунеизегьтәи аԥсуа-абаза конгресс анагӡаратә маӡаныҟәгаҩ, Аԥсны Жәлар Реизара адепутат Инар Гыцба арадио Sputnik аефир аҟны еиҭеиҳәеит аԥсуа-абаза етнос аҿиара ацхрааразы иаԥҵоу афестиваль "Абаза" аҳәаақәа ирҭагӡаны сынтәа имҩаԥгаз аиԥыларақәа рҿы излацәажәаз, ас еиԥш ауснагӡатә аимадарақәа рырӷәӷәара иахьынӡацхраауа, аҵакы атәы.
Акультура-спорттә фестиваль "Абаза" мҩаԥысит ԥхынгәы 22 – 23 рзы Ҟарачы-Черқьесиа. Ари ахҭыс есышықәса еиҿнакаауеит аԥсуа-абаза жәлар рыҿиара иацхраауа жәларбжьаратәи ассоциациа "Алашара". Уи инамаданы еиҿкаан аиԥыларақәа, астол гьежьқәа, дара ирылахәын аԥсуа-абаза хылҵшьҭрақәа рхаҭарнакцәа.
Аспортсменцәа ракәзар, ашьапылампыл, ахыци ахәымпали рыла ахысра, анапылампыл, аҩра, урыла аԥара, ашаха иаханы аиҭагара уҳәа еиуеиԥшым абаҩрҵәыра ахкқәа рыла рхы ԥыршәон.
Афестиваль аҳәаақәа ирҭагӡаны имҩаԥгаз афорум иалахәын Урыстәылатәи Афедерациа асенаторцәа, адепутатцәа, хыԥхьаӡарала имаҷу егьырҭ амилаҭқәа рхаҭарнакцәагьы иҳәеит Гыцба.
"Ас еиԥш ауснагӡатә даара ихадоуп. Хымԥада лассы-ласс ҳаибабалароуп, ҳаизыҟазаашьа арӷәӷәаразы ас еиԥш апроектқәа рымҩаԥгаразы, рынагӡаразы аиҭанеиааирақәа ыҟазароуп. Ҳашьцәа ахьыҟоу, Нхыҵ-Кавказ мацара азы акәӡам изысҳәо, зегьынџьара аус ҳуроуп", - иҳәеит Гыцба.