Ибжьаратәу азанааҭқәа рыла ашықәс аҩнуҵҟа 20- 25 ҩык инарзынаԥшуа астудентцәа аузыжьуа Галтәи агуманитартә коллеџь сынтәатәи аҵарашыкәс хзыркәшада, иарбан занааҭқәоу иззыҟарҵо, адкыларазы аԥышәаракәа ианрылаго атәы арадио Sputnik аефир аҟны еиҭалҳәеит Галтәи агуманитартә коллеџь аиҳабы Гәында Кәарҷиаԥҳа.
"Ахәыҟаҵаҩ изанааҭ ала 15-ҩык аҵаҩцәа ҳаман, сынтәа иалгеит. Алагараҭатә класс арҵаҩы изанааҭ ала жәҩык алгеит. Иҟоуп иалгаз рыбжьара Очамчыра, Тҟәарчал, Гал араионқәа рҟынтә астудентцәа. Ахәыҷбаҳчахь, ашколахь аусура ицо дыҟоуп, аиҳарак ақыҭақәа рҿы аус руеит. Аколлеџь аҟны акурсқәагьы ҳаман, аха урҭ 4 - 6 мзы иҟоу ракәын, акомпиутер аҵареи аелектрикцәеи рзы, аха урҭ ирыдҵаало маҷуп", - лҳәеит Кәарҷиаԥҳа.
Лара лажәақәа рыла, аколлеџь ианҭало иааизакны 90-100 ҩык рҟынӡа астудентцәа рхыԥхьаӡара аннеиуа ыҟоуп, аха аҵарашықәс цонаҵы урҭ рхыԥхьаӡара иагхоит. Алагарҭатә класс арҵаҩы изанааҭ ала хышықәса аҵара ҵатәуп. Галтәи агуманитартә коллеџь аиҳабы лажәақәа рыла, сынтәа иаларгалар рҭахуп аҩныргылаҩ изанааҭ. Нанҳәа 25 рзы аԥышәарақәа мҩаԥыргап ҳәа ауп. Ахәыҟаҵаҩ изанааҭ шықәсык 6 нызқь мааҭ ахшәаатәын, сынтәа, аколлеџь аиҳабы лажәақәа рыла, аҵара ахә 8 нызқь мааҭ рҟынӡа иацырҵап ҳәа ауп, иаҭаху амарҭхәқәа раахәаразы. Арҵаҩы изанааҭгьы шықәсык уиаҟара ауп иақәу, лҳәеит Кәарҷиаԥҳа. Афымцазҟаза изанааҭ азы акурсқәа 4 нызқь мааҭ иаԥсоуп.
Аицәажәара инеиҵыхны ишәаҳар шәылшоит аудиофаил аҟны хыхь.