Аҭоурыхтә ҵабырг иацәыхароу ажәабжьқәа Аԥсны иаҭаауа аԥсшьаҩцәа рызнагара уи аҳәынҭқарра аҳаҭыр аларҟәра иадыргоуп. Закәаншьаҭада аус зуа, хадаратәла Аԥсны иатәылауаам аекскурсиа амҩаԥгаҩцәа раанкыларазы Аԥсны атуризм аминистрра аусзуҩцәа, Аԥсны Аҩнуҵҟатәи аусқәа рминистрреи Аекскурсиа амҩаԥгаҩцәа Рассоциациеи алархәны аамҭа-аамҭала агәаҭарақәа мҩаԥыргоит. Убас хәымштәи агәаҭарақәа раан иалкаан 26-ҩык закәаншьаҭада аус зуаз аԥсшьаҩцәа рымҩаԥгаҩцәа. Урҭ раарԥшра шалдыршо, рахьырхәразы зинс иҟоу, ахараԥсақәа шыддыршәо, закәаншьаҭада аекскурсиақәа мҩаԥызго ралкаара иацу ауадаҩрақәа ртәы арадио Sputnik аефир аҟны еиҭеиҳәеит Аԥсны атуризм аминистрра акурорт-туристтә индустриа азԥхьагәаҭареи аҿиареи ранализ аҟәша аспециалист хада Ҭарашь Хәытаба.
Аицәажәара инеиҵыхны ишәаҳар шәылшоит аудиофаил аҟны хыхь.