“Аԥсуаа рчараура: ҳтрадициеи иахьтәи аамҭеи” захьӡу ашәҟәы еиднакылаз аматериалқәеи, афактқәеи дырзааҭгылеит арадио Sputnik аефир аҟны уи автор, аҵарауаҩ Елисо Сангәлиаԥҳа.
Лара иазгалҭеит ари ашәҟәы лкандидаттә диссертациа ишалҵшәахаз.
"Ашәҟәаҟны атрадициақәа амцхә сҽыргәыласхалеит сҳәаргьы ауеит, иацы иҟаз мҳәакәа, иахьатәи ҳәашьа амаӡам. Еиҿурԥшырц азы иаҭахуп уи. Сышәҟәы 2020 шықәсазы ихсыркәшеит. Уи ҩны салгеижьҭеи иахьанӡагьы убасҟак аҽеиҭанакит, араҟа сызлацәажәо аасҭа ҽаԥарк ицахьеит (аԥсуаа рчараура азы-азгәаҭа), ҳҵасқәа убриаҟара рҽеиҭаркит. Апандемиа анаҩс акарантин ҳанҭыс, убриаҟара аиҭарақәа аланагало иалагеит. Акарантин ҟалаанӡеи уи ашьҭахьи аҵасқәа рыҭҵаара ҳалагар ахәҭоуп, иахьа убасҟак аҽыԥсахра ирласны ицоит. Хышықәса рыҩнуҵаҟа имҩаԥысыз аиҭакрақәа ирызкны даҽа шәҟәык уҩҩыртә иҟоуп", - лҳәеит Сангәлиаԥҳа.
Ашәҟәаҟны иаарԥшуп азеижәтәи ашәышықәса инаркны аҩажәатәи ирыбжьанакыз аамҭазы аԥсуа чара аушьа, убасгьы иаагоуп иахьатәи аԥсуа чара ахәԥса ахьынӡанаӡоз 2011 инаркны 2019 шықәсанӡа ҳәа лҳәеит Сангәлиаԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.