АҞӘА, нанҳәа 15 - Sputnik. Урыстәыла ахада Владимир Путин Жәларбжьаратәи ашәарҭадараз XI Москватәи аконференциаан адунеи атәылақәа рахь ааԥхьара ҟаиҵеит ашәарҭарақәа рҿаԥхьа рҽеидыркыларц. Ахада иҳәамҭа кьыԥхьуп Кремль асаит аҿы.
"Еиҭасҳәоит, иахьа еилыкка иубоит аиҿагылара аҟазшьа арԥсыҽраз, ашәарҭарақәа рырмариараз, аҳәынҭқаррақәа рыбжьара агәреибагара арӷәӷәаразы, урҭ рыҿиара еиҳа арҭбааразы иаҭахны ишыҟоу адунеитә уаажәларратә еилазаара аҽазышәарақәа реидкылара", - иҳәоит ахада.
Путин инаҵшьны иазгәеиҭеит Урыстәыла аҳәынҭқаррақәа реиҟарареи жәларбжьаратәи азин ақәныҟәареи ахьазхарҵо хырхарҭарацәалатәи адунеитә еиҿкаара ишадгылаҩу.
Адунеи арегионқәа рҿы ихәыҵҟьоит уаанӡатәи аимакқәа, ицәырҵуеит аҿыцқәа иҳәоит Путин. Ари аиҳарак мзызс иамоу ЕААи НАТО атәылақәеи егьырҭ аҳәынҭқаррақәа рнапаҵаҟа иҟаҵаны, рмалқәа рыцәгара иахьырҭаху ауп иҳәеит иара.
Урыстәыла ахада иажәақәа рыла, бџьаршьҭыхла аиҿагылара акосмостәии аинформациатәии ҵакырахь рыиагара рҽазыршәоит. Ари аҩыза аполитика алҵшәақәа убарҭоуп Ливиеи Малии, иара убасгьы ԥаралеи бџьарлеи иҟарҵо ацхыраара иахҟьаны амцабз еиҳа-еиҳа иахьеилашыҩкуа Украинеи иҳәоит Путин.