8-9 аклассқәа рзы арҵагатә шәҟәқәа Аԥснытәи ашколқәа ирзыршараны иҟоуп, дара иаарласны Урыстәылатәи аҵара министрра иаанашьҭуеит Аԥсныҟа. Ахԥатәи ахәҭа аҟны иззыԥшу арҵага шәҟәқәа рхыԥхьаӡареи уажәаԥхьа иаарышьҭхьаз разымхара мзыс иамоуи атәы арадио Sputnik аефир аҿы еиҭеиҳәеит Аԥсны аҵара аминистрра аинформациатә ҟәша аиҳабы Аслан Қәҭелиа.
Ҳара иаҳхарам амзызқәа ирхырҟьаны аиԥҟьарақәа ҟалеит ашәҟәқәа раагараҿы, аха аҵарашықәс иалагаанӡа урыстәылатәи ҳколлегацәа ҳақәдыргәыӷит урҭ шыҟало ҳәа адырра ҟаиҵеит Қәҭелиа.
"Уажәазы хыԥхьаӡарала 30 нызқь инареиҳаны иаауеит. Аха иахьатәи аамҭаз ицоит ацәажәарақәа апроект ацҵаразы. Избанзар, иаагаз ашәҟәқәа рзы еиҭа аҭахрақәа ыҟоуп. Аклассқәа рҿы итәоу аҵаҩцәа рхыԥхьаӡара аҽаԥсахуеит, еиҳа еиҳахеит, уи адагьы ашколқәа рҿы аиҭаҵрақәа ыҟоуп, уи оуп ашәҟәқәа разымхарагьы зыхҟьаз. Уи харҭәааны ҳашьҭаҵарҭақәа рҿы ҵәахык ҳамазарцаз аусурақәа цоит", - ҳәа еиҭеиҳәеит Қәҭелиа.
Аԥсны аҵара аминистрра аинформациатә ҟәша аиҳабы иара убасгьы иҳәеит ахәыҷқәа рнапаҿы иҟоу ашәҟәқәа ахылаԥшра рыҭара ргәы ишҭоу атәы.
Инарҭбааны аиҿцәажәара шәазыӡырҩыр шәылшоит арадио Sputnik Аԥсны аефир аҿы мамзаргьы аудиофаил аҿы.