АҞӘА, нанҳәа 23 - Sputnik. Агәыԥ "Вагнер" аиҳабы Евгени Пригожин Твертәи аобласт аҟны икаҳаз ахатәы ҳаирплан Embraer Legacy апассаџьырцәа рсиа дахыԥхьаӡалоуп. Абри атәы аанацҳауеит РИА Новости Росавиациа шьаҭас иганы.
Урыстәыла АҶА аҟны ирҳәеит аҳаирплан аҩнуҵаҟа жәаҩык апассаџьырцәа шҭаз, урҭ рахьынтәи хҩык аекипаж ракәын, заанаҵтәи адыррақәа рыла зегьы ҭахеит.
Ԥыҭрак анаҩс аусбарҭаҿы ишьақәдырӷәӷәеит аҳаирплан ахькаҳаз ақыҭа Куженкино ишыԥшааз иҭахаз рыԥсыбаҩқәа. Аиқәырхаратә усурақәа ирыцҵоуп.
Аҭыԥ аҟны иҟоуп азинхьчаратә усбарҭақәа русзуҩцәа, иҭырҵаауеит ахҭыс ахҟьа-ԥҟьақәа.
Евгени Пригожин - Ахатәы арратә еилахәыра (ЧВК) "Вагнер" аиҳабы, Украинатәи арбџьармчқәа ирҿагыланы Донбасс деибашьуан.
Иара иганахьала ашьаус хацыркын рашәара 24 2023 шықәсазы "Вагнер" аибашьцәа Ростов-на-Дону ақалақь аҟны иҟоу Аладатәи аррратә штаб рымпыҵахалара ахьеиҿикааз азы. Ари ҟалеит урыстәылатәи аруаа "Вагнер" ар ахьгылоу аҭыԥқәа рыҟны атылтә аракета-бомбатә ааха рырҭеит ҳәа Пригожин иҟаиҵаз аҳәамҭа ашьҭахь. Ари аҳәамҭа ҿаԥырҽит Урыстәыла атәылахьчара аминистрреи Ашәарҭадаратә маҵзуреи рыҟны.
Анаҩс, Белоруссиа ахада Александр Лукашенко Владимир Путин иақәшаҳаҭрала Евгени Пригожини иареи аицәажәара мҩаԥигеит, уи иалҵшәаны Ахатәы арратә еилахәыра (ЧВК) анапхгаҩы дақәшаҳаҭхеит "Вагнер" аибашьцәа ԥхьаҟа рцара аанкылара. Пригожин иганахь ала ашьаусҭҵаара аанкылан.