АҞӘА, нанҳәа 26 - Sputnik. Аԥсны ахада Аслан Бжьаниа Владислав Арӡынба Ешыра ақыҭан иҳаҭгәын аҿы ашәҭқәа шьҭеиҵеит. Абри атәы аанацҳауеит ахада ипресс-маҵзура.
Ашәҭшьҭаҵара инеит ахада Иусбарҭа, Апарламент, Аминистрцәа реилазаара рхаҭарнакцәа, Урыстәыла ацҳаражәҳәаҩ Михаил Шургалин, Афедерациа ахеилаки Аҳәынҭдумеи рҟынтәи аделегациа ахаҭарнакцәа, аибашьра аветеранцәа, иҭахаз ранацәа, ауаажәларра.
Анаҩс Аслан Бжьаниа ддәықәлеит Очамчыра араион Џьгьарда ақыҭахь аҩбатәи ахада Сергеи Багаԥшь инышәынҭрахь - уи ихаан ауп Аԥсны Ахьыԥшымра азхаҵара анаиу.
Нанҳәа 26, 2008 шықәса рзы Урыстәыла ахада Дмитри Медведев Аԥсни Аахыҵ Уаԥстәылеи рхьыԥшымрақәа разхаҵаразы аусԥҟа инапы аҵеиҩит. Уи аахыс ари амш атәылаҿы иҳәынҭқарратә ныҳәаны иазгәарҭоит.