АҞӘА, нанҳәа 26 - Sputnik. Аԥсны Абаҩрҵәыреи аспорти зҽаԥсазтәыз русзуҩ, Ареспубликатә хәыҷтәы-спорттә школ аиҳабы Иури Логәуа иԥсҭазаара далҵит 67 шықәса дшырҭагылаз, абри атәы аанацҳауеит Аԥсны Аҿари аспорти рзы аҳәынҭеилакы.
"Иури Ирадион-иԥа илагала рацәоуп ҳтәыла аспорт арҿиара аус аҿы. Иара иԥсҭазаара иалҵра зхаҵара уадаҩу цәыӡ дууп. Аԥсны Аҿари аспорти рзы аҳәынҭеилакы гәалсра дула ирыдышшылоит Иури Ирадион-иԥа иуацәеи иҭынхацәеи, дыздыруази дызҭахызи зегьы", - ҳәа ануп анҵамҭаҿы.
Иури Логәуа диит мшаԥы 29 1957 шықәса рзы. Иара аспорт инапы алеикит дышқәыԥшӡаз, 15 шықәса анихыҵуаз Қрыҭтәылатәи ССР ачемпионат аҿы дыхәмаруан Очамчыра акоманда "Амирани" далахәыланы. 1973 шықәсазы ашьапылампыласҩы даарыԥхьеит аҟәатәи "Динамо" ахь, уа иара дыхәмаруан 1987 шықәсанӡа.
Иури Логәуа - 1992-1993 шықәсқәа рызтәи Аԥсны жәлар Рџьынџьтәылатә еибашьра даветерануп. Аибашьра анеилга ашьҭахь иара аус иуан Ареспубликатә хәыҷтәы-спорттә школ аҟны ашьапылампыл азыҟаҵаҩс, 2005 - 2014 шықәсқәа рзы Аԥсны Аҿари аспорти рзы аҳәынҭеилакы ахантәаҩы ихаҭыԥуаҩс.