АҞӘА, нанҳәа 27 - Sputnik. Асовет, аурыс режиссиор Глеб Панфилов иԥсҭазаара далҵит 89 шықәса дшырҭагылаз. Абри атәы аанацҳауеит РИА Новости, атеатр "Ленком" аиҳабы Марк Варшавер иажәақәа шьаҭас иҟаҵаны.
"Арыцҳара ҳақәшәеит. Идунеи иԥсахит арежиссиор ду Глеб Анатоли-иԥа Панфилов", — иҳәеит аинформмаҵзура иацәажәоз.
Уаанӡа, лаҵарамзазы адырра ҟарҵахьан арежиссиор адабла исны Склифосовски ихьӡ зху аҭҵаарадырратә институт аҿы дышьҭарҵеит ҳәа. Аҵыхәтәантәи амзақәа рзы Панфилов иҽихәышәтәуан, нанҳәамзазы Варшавер иҳәахьан уи ихы бааԥсны ишибоз, аха аҳақьымцәа иҭагылазаашьа хар амам ҳәа ахырҳәаауан.
Глеб Панфилов диит лаҵара 21 1934 шықәса рзы Магнитогорск. 1966 шықәса рзы иара "Ленфильм" аусура далагеит, уа иара раԥхьатәи иусумҭа "В огне брода нет" ҭихит. Реиҳа еицырдыруа иусумҭақәа - "Начало", "Васса", "Без вины виноватые" роуп. Уи адагьы, иара атеатр арежиссиорс деицырдыруеит.
1984 шықәса рзы Панфилов РСФСР Жәлар рартист ҳәа ахьӡ ихырҵеит. СССР Жәлар рартистка Инна Чурикова иԥшәмаԥҳәыс лакәын. Дара афильм "Начало" аҟны еибадырит, анаҩсгьы ифильмқәа рҿы дҭихуан. Лара лыԥсҭазаара далҵит 2023 шықәса алагамҭазы.