АҞӘА, нанҳәа 28 - Sputnik. Урыстәыла Афедералтә шәарҭадаратә маҵзура Владивосток дааныркалеит ЕАА Ахаҭарнакра хада уаанӡатәи аусзуҩ Роберт Шонов, иара америкатәи адипломатцәа рыдҵала урыстәылауаа рыбжьара аҿагыларақәа ирызхиаз ауаа иԥшаалар акәын. АШәМ авидеонҵамҭа акьыԥхьит.
ЕАА Ацҳаражәҳәарҭа актәи амаӡаныҟәгаҩ Девид Бернстаин иакәын адҵа сызҭоз, сара ажурналистцәеи, анаплакҩцәеи, аполитикцәеи рыбжьара ЕАА ибзианы иазыҟаз, урҭ аинформациа аидкыларазы исыцхраауаз сыԥшаар акәын,- иҳәеит Шонов.
Шонов даанкылан Владивосток хәажәкырамзазы. Иара цәыббра 2022 шықәса раахыс Москва иҟоу ЕАА Ацҳаражәҳәарҭа аусзуҩцәа Джеффри Силлини Девид Бернстаини рыдҵақәа шынаигӡоз шьақәырӷәӷәоуп. Шонов хараны идырҵоит "Имаӡоу аинформациала атәым ҳәынҭқарра аусацура".
ЕАА аҟны аҳәамҭа ҟарҵеит, ацҳаражәҳәарҭа уаанӡатәи аусзуҩ ирхарырҵо "ҵаҵӷәык шамам" ҳәа.