АҞӘА, цәыббра 2 – Sputnik. Арбаикатәи аҳаԥы аҭалараан арекорд ҿыц шьақәыргылоуп, абри атәы арадио Sputnik аҟны иҳәеит урыстәылатәи аспелеологцәа рыклуб ахаҭарнак Николаи Иванов.
Ари аԥхынразы имҩаԥгаз аҭҵаарақәа рылҵшәақәа бзиоуп. Веревкин иҳаԥы аҿы москватәи ҳколлегацәа аклуб "Перово" аҟынтәи ҩ-нызқь метра алада аӡаҵаҟатәи адрон аурышьҭит. Иара 26 метра илбааит, афото-авидео ҭнахит, адунеи аҟны реиҳа иҵаулоу аҳаԥы ҳәа ишьақәнырӷәӷәеит- 2223 метр", - иҳәеит Иванов.
Гагратәи ашьхеибаркыраҿы аҳаԥы (Арбаика) аҭаларҭа ԥшаан 1982 шықәсазы Красноиарсктәи аспелеологцәа рыбзоурала. Аҳаԥы иаҭан С-115 аномер. Ԥшьышықәса рнаҩс аҳаԥы ихьӡ ахҵан Ҟабарда-Балкариатәи аҳаԥы Су-Акан аҭалараан иҭахаз аспелеолог Александр Веревкин.
Аҳаԥы инарҵауланы иҭҵааӡам. 2014 шықәсазы аҭҵааразы аусурақәа ирыцҵахеит, аҵыхәтәантәи аекспедициа мҩаԥган 2017 шықәсазы.
2018 шықәсазы урыстәылатәи аспелеологцәа 2 212 метра илбааит.