АҞӘА, цәыббра 11 – Sputnik, Асмаҭ Ҵәыџьԥҳа. "Мастерская" аспектакльқәа хәымш аныҳәа ҳзыҟарҵеит, атеатр азал ҭәын иҳәеит РУСДРАМ анапхгаҩы Иракли Хынҭәба.
Иара иазгәеиҭеит агастрольқәа ишаадырԥшыз аԥсуа хәаԥшҩы аҭыԥантәи атеатрқәа реиԥш аҳәаанырцәтәиқәагьы рбара дшазыгәышьуа.
"Иссирыз арҭ ахәымш рыҩнуҵҟа еиԥшымыз аспектакльқәа хәба дырбан. Сгәанала, ахәаԥшҩы ацәанырра ссирқәа изцәырган, иҿыцыз, иаартыраз", - иҳәеит иара.
Агастрольқәа рхыркәшамҭаз идырбан ахәыҷтәы спектакль "Аизумрудқалақь аџьашьахәҟаҵаҩы".
Ахәаԥшыҩцәа хәыҷқәа Sputnik иазеиҭарҳәон ргәаанагарақәа. Жә-шықәса зхыҵуа Лорена илҳәеит ақәыргыламҭа шылгәаԥхаз, аиҳаракгьы актиорцәа рыхәмаршьа. Ахәаԥшҩы Дианагьы иазгәалҭеит актиорцәа рыхәмаршьа. Аиҩызцәа Саломеиеи Амелиеи ракәзаргьы, агәаԥхара ду аадырԥшуан.
"Аспектакль маҷк иаузаргьы, аинтерес аҵан. Актиорцәа даара иқьачақьуан", - лҳәеит Саломеиа.
Санкт-Петербургтәи атеатр "Мастерская" агастрольқәа еиҿкаан "Агастроль дуқәа" апрограмма аҳәаақәа ирҭагӡаны. Хәымш ирылагӡаны урыстәылатәи артистцәа РУСДРАМ асценаҟны иқәдыргылеит ррепертуар аҟынтәи хә-спектакльк: цәыббра 6 - "Ромеои Џьульеттеи", цәыббра 7 - "Аҳәса", цәыббра 8 - "Варшаватәи амелодиа", цәыббра 9 – " Аизумрудқалақь аџьашьахәҟаҵаҩы", цәыббра 10 – "Винни-Пухи зегьы-зегьы-зегьи".