Адунеизегьтәи аҿар рфестиваль аҽазыҟаҵаратә еилакы аусура хацыркуп. Уи аҳәаақәа ирҭагӡаны Аԥсны аусура иалагеит афестиваль аҽазыҟаҵаразы хазы игоу амилаҭтә еилакы. Иара хацыркын Аԥсны аҿари аспорти русқәа рзы аилак имҩаԥнагаз аилатәараҿы. 2024 шықәсазы еиҿкаахо афестиваль мҩаԥгахоит Шәача Урыстәыла афедералтә дгьылҵакыра "Сириус" аҟны хәажәкыра 1 инаркны 7-нӡа. Аҿари аспорти русқәа рзы аҳәынҭқарратә еилакы аҿар рыҟәша аиҳабы Идрис Кара-Осман-оӷлы арадио Sputnik аефир аҟны еиҭеиҳәеит афестиваль аиҿкаашьа шазгәаҭоу, Аԥсны уи алахәхара шыҟало.
"Иҳамоу адыррала, афестиваль иадгалахоит 20 нызқьҩык раҟара аҿарацәа. Аԥснынтәи уи иалахәхаразы 50-ҩык инареиҳаны рҭыԥ ҳарҭараны иҟоуп. Ари амза 8 рзы ҳаиԥылеит афестиваль аҽазыҟаҵаразы амилаҭтә еилакы ашьақәыргыларазы. Егьырахь Аԥсны араионқәа зегьы рҟынтәи ацхыраара ҳарҭароуп, иреиӷьу ҳҿар алхны Шәача афестиваль ахь рышьҭразы. Уа рхы аадырԥшыр рылшоит аҵарадырра, аспорт бзиа избо, амедиа, агәабзиара аусхк аганахьала зхы аазырԥшыр зылшо. Уа убас апрограмма шьақәгылоуп, досу ихы ззикырц ииҭаху азы адырра ҿыцқәа иоуртә еиԥш аҭагылазаашьа ҟалоит. Аԥсны аҟынтәи алшара ду ҳамоуп уа ишақәнагоу ҳхы ааҳарԥшырц, ҳҿарацәагьы ирыхәоит инеины акы рҵарц, аԥхьаҟа уи рыхәартә иҟалартә еиԥш", - иҳәеит Кара-Осман-оӷлы.
Аицәажәара инеиҵыхны ишәаҳар шәылшоит аудиофаил аҟны хыхь.