АҞӘА, цәыббра 23 - Sputnik. Амҽыша, цәыббра 17 рзы, Урыстәыла АҶА аусзуҩцәа Ливиа аӡхыҵрақәа рышьҭахь ахыбрақәа ахьеилаҳаз ихәыҵырхит аԥсыбаҩқәа 137. Абри атәы аанацҳауеит аусбарҭа апресс-маҵзура.
25-ҩык рыԥсыбаҩқәа рыԥшааит аҵыхәтәантәи уахыки-ҽнакиы рыла, 23-ҩык иахьыуадаҩыз аҭыԥқәа рҟны ирԥшааит, даҽа ҩыџьа - аилабгарақәа ирыҵыргеит.
Аусура иалагеижьҭеи, ирхысхьеит 80 километра ԥшьыркца аҵакыра, 33 нызқь метр ԥшьыркца аӡымҽхакыра. Урыстәылатәи аиқәырхаҩцәа амедицинатә цхыраара рырҭеит 552-ҩык аахақәа зауз, урҭ рхыԥхьаӡараҿы 54-ҩык ахәыҷқәа.
Ливиа аӡхыҵрақәа ҟлаеит аԥшатлакә "Даниель" ашьҭахь цәыббра 10 рзы. Зегь реиҳа аԥхасҭа ҟалеит атәыла мрагыларатәи ахәҭаҿы, еиҳарак ақалақьқәа Сусеи Дернеи рҿы.
Амза Ҟаԥшь аҭыԥантәи аҟәша иҟанаҵаз адыррала, иҭахаз 11 нызқьҩык ауаа инареиҳаны иҭахеит, 20 нызқьҩык хабарда ибжьаӡит. Уи адагьы, 38 нызқьҩык ауааԥсыра рыҩнқәа ныжьны ицар акәхеит.