Аԥсны Жәлар рџьынџьтәылатә еибашьраан иԥсадгьыл ахьчара дааит, Аԥсны ахақәиҭрагьы ихы ақәиҵеит Леон иорден занашьоу Ведаҭ Кәаӡба. Иан Ԥериҳан Қапԥҳа Аиааира 30 шықәса ахыҵра аламҭалазы урҭ ахҭысқәа арадио Sputnik аефир аҟны илгәалалыршәеит .
Ҭырқәтәыла, Енегиоль ақалақь аҿы инхоз ҳџьынџьуаҩ Ведаҭ Кәаӡба дҭахеит 1992 шықәса, абҵарамза анҵәамҭазы Кәачара ақыҭа ахақәиҭтәразы имҩаԥгаз ажәылараан. Ведаҭ инышәнап Гәдоуҭа аиашьаратә нышәынҭраҟны иҟалеит, аибашьраҿы иҭахаз иҩыза Ефқан Цыба изы инапала иижхьаз анышәынҭраҿы. Ефқан иан иҟалҵаз аҳәарала иԥсыбаҩ Ҭырқәтәылаҟа ишьҭын.
"Ведаҭ Аԥсныҟа дмааӡацызт аибашьра ҟалаанӡа. 25 шықәса ихыҵуан. Санцалак сааӡом, сымԥсыргьы уа саанхоит ҳәа сеиҳәеит. Ара даанхар иҭахын", - ҳәа лгәалалыршәеит Ведаҭ иан Ԥериҳан Қапԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.