АҞӘА, цәыббра 30 - Sputnik. 200-ҩык ахәыҷқәа инареиҳаны Аԥсны Аиааиреи Ахьыԥшымреи рымш аҳаҭыр азы аекскурсиақәа ирҭааит, абри атәы лҳәеит Аҟәа аҵара аусбарҭа аиҳабы Асҭанда Ҭаркьылԥҳа.
Апроект еиҿкаан аилахәыра "Гаруда" абзоурала, Аҟәа аҵара аусбарҭа адгыларала.
"Ас еиԥш иҟоу аҵараиуратә екскурсиақәа ҳхәыҷқәа рааӡараҿы аҵак ду рымоуп, урҭ ирыбзоураны дара еиҳа инарҵауланы еилыркаауеит ҳҭоурыхи ҳкультуратә ҭынхеи. Урҭ иагьеилыркаауеит, ргәаҵанӡагьы инеиуеит рыжәлар зхысыз, аҭынчреи ахақәиҭреи зыԥсоу. Ҳара агәыӷра ҳамоуп аилахәыра "Гарудеи" ҳареи ҳусеицура наҟ-наҟгьы иҵегь иацҵахоит ҳәа", - лҳәеит Ҭаркьылԥҳа.
6-7 аклассқәа рҵаҩцәа ирҭааит аҭоурыхтә баҟақәа, амузеиқәа, аибашьра ахьымҩаԥысуаз аҭыԥқәа, уа дара ираҳаит аҭоурыхтә хҭысқәа ртәы, аветеранцәа ирыҿцәажәеит.
Ашколхәыҷқәа иара убас иаҭааит Аԥсны Раԥхьатәи ахада Владислав Арӡынба анышә дахьамадоу.