АҞӘА, жьҭаара 6 – Sputnik, Бадраҟ Аҩӡба. Акультура-устә центр "Москва Аҩны" Нестор Лакоба ихьӡ зху Аҟәатәи ашкол №10 абиологиеи афизикеи рзы алабораториатә комплексқәа, иара убасгьы акомпиутертә хархәагақәа арҭеит.
"Уаанӡагьы арҭ рҩызцәа алабораториатә комплексқәа Аԥсны ашколқәа ираҳҭахьан. Уи адагьы акомпиутертә классқәеи абиблиотекақәеи ҳрыцхраахьан. Ажәабатәи ашкол аҟынтәи азыҳәа ҳауит, рҭахрақәа арбаны. Сынтәа ҳара иҳауит алшара ҩ-лабораториатә комплекск рзааҳашьҭырц", - иҳәеит "Москва Аҩны" адиректор Александр Бигәаа.
Иара агәыӷра ааирԥшит арҭ алабораториа маҷқәа ахәыҷқәа ринтерес шьҭырхып ҳәа.
"Уаанӡа алабораториатә усумҭақәа атетрадқәа рҿы иадырбон. Арҭ акомплексқәа ирылҵшәаны ахәыҷқәа аԥышәарақәа мҩаԥыргалоит, афизикеи абиологиеи еиҳа ирзааигәахоит, аекспериментқәа ҟарҵалоит", - иҳәеит Бигәаа.
Лабораторные комплексы по биологии и физике
© Sputnik / Леон Адлейба
Амобилтә комплексқәа адемонстрациатә експериментқәеи алабораториатә усурақәеи ирзырхоуп. Арахь иаҵанакуеит амаругақәа, ахархәагақәа, ацифратә шәагақәа, аинтеракттә ресурсқәа, амультимедиатәи атесттәи материалқәа.