АҞӘА, жьҭаара 6 – Sputnik, Бадри Есиава. Гагра жьҭаара 6 рзы иазгәарҭеит араион Ахақәиҭтәра амш.
Асааҭ 11:00 рзы имҩаԥысит Владислав Арӡынбеи аԥсадгьыл ахьчаҩцәеи рбаҟақәа рымҵаҿы ашәҭшьыҵәрақәа рышьҭаҵара ацеремониа, анаҩс имҩаԥган амитинг ҳәа еиҭалҳәеит араион ахадара акультура аҟәша аиҳабы Мадина Бганԥҳа.
Ауснагӡатә иалахәын араион ахадара, аибашьра аветеранцәа, аҳәынҭусбарҭақәеи ауаажәларреи рхаҭарнакцәа.
Гагра иазгәарҭеит араион Ахақәиҭтәра амш
© Foto / Администрация Гагрского района
"Иахьа Владислав Арӡынба ихьӡ зху амҩаду аҿы иаартын Аԥсны Афырхаҵа Роберт Кәарҷиа ибаҟа. Ара абаҟа уаанӡагьы игылан, аха аевкалипт ақәҳан иԥҽит. Араион ахадара ирыӡбеит абаҟа ҿыц аргыларазы аԥара азоурышьҭырц", - лҳәеит Бганԥҳа.
Асааҭ 19:00 рзы Аиааира ашҭаҿы иазԥхьагәаҭоуп аныҳәатә концерт. Апрограмма хыркәшахоит салиутла.
Аԥсуа ардыԥхьалеи хатәгәаԥхарала еибашьуази Гагра араион ақырҭуа фашистцәа ирымпыҵырхит 1992 шықәса жьҭаара 6 рзы. Ари аоперациа Аџьынџьтәылатә еибашьраан раԥхьатәи қәҿиарахеит.