АҞӘА, жьҭаара 12 - Sputnik. "Амшынеиқәафымцамч" ԥхынҷкәынмза 15 азынӡа ихнаркәшоит афымцамч ахархәаҩцәа рышәҟәҭагалара, урҭ рхыԥхьаӡара ашьақәыргыларази руалқәа ргәаҭарази лҳәеит аилацәажәара иалахәыз аԥыза-министр ихаҭыԥуаҩ, аекономика аминистр Кристина Озган.
Лара лажәақәа рыла, аминистрра ареспубликатә наплакқәеи аминистррақәа русзуҩцәеи афымцамч аԥара еиӷьны ахә ахыршәааларц азы аусурақәа мҩаԥыргоит.
Александр Анқәаб Озгани Делбеи анапынҵа риҭеит иаздырхиарц ауал ашәареи зых иархәоу афымцамч ахә ашәареи алзыршаша ауснагӡатәқәа ркомплекс.
Аԥыза-министр ихаҭыԥуаҩ, афинансқәа рминистр Владимир Делба еиҭеиҳәеит ҩынтә ашәахтәқәҵара алмыршареи ахашәалақәа ршәахтә ахацәхьакра аԥырҟәҟәаареи рзы аԥсны-урыстәылатә еиҳабырабжьаратә еиқәшаҳаҭра азырхиара ишаҿу. Иара иҳәеит амилаҭтә шәахтә система ааидкыланы аиӷьтәразы аусурақәа шцо.