АҞӘА, жьҭаара 12 – Sputnik, Бадри Есиава. Иурчик ҳәа хьӡыс измоу персиатәи алышькьынтыр Аацы ақыҭаҿы иҟоу алымқәа рпарк "Прайд" аҿы иҟазаауеит уажәшьҭарнахыс ҳәа Sputnik иазеиҭеиҳәеит аобиект ашьаҭаркыҩцәа ируаӡәку Олег Кононов.
"Иурчик 2,5 шықәса ихыҵуеит. Гагра агәашьаркыраҿы игылаз афотоҭыхцәа ирымхәҳҳаит. Нанҳәа 30 раахыс ҳара ҳҿы иҟоуп. Уажәы иара аусзуҩцәа ирышьцылахьеит, аҭыԥ ҿыц иашьцылеит. Аҭааҩцәа рахь ицәыраагар ауеит", - ҳәа азгәеиҭеит иара.
Кононов ишиҳәо ала, аԥстәазы иахәҭаны иҟоу аҭагылазаашьақәа аԥҵоуп. Аҭакырҭа ааигәа-сигәа еиҭаҳауп афиниктә пальмқәеи амагнолиақәеи, иахьҭаку аҭыԥ рԥхоуп, ашьҭаларҭа азырхиоуп, аӡы ыҟоуп. Кононов иҳәеит апарк анапхгара ргәы ишҭоу алышькьынтыр аԥс аахәара.
"Алышькьынтырқәа ирхылҵуа ԥшшәыла ишыҟало ҳаздырам, аха аиҳарак еиқәаҵәақәоуп идриуа. Иара убасгьы амахҽи абнацгәи рзгьы Урыстәыла азоопаркқәа рҿы аҩызцәа рзаархәараны иҟоуп", - иҳәеит иара.
Иурчик алымқәа ирцәыхараны иҭакуп. Ааигәара иҟоу амахҽ Ромео ауп. Иахьҭаку аволиер 12х6 метра иҟоуп, аха иҵегьы ирҭбааны асаркьа ҭарсараны рыгәҭакуп. Агыгшәыг аҟазшьақәа цәгьоуп, ааигәа инанашьҭуа Олег Кононови даҽа усзуҩыки роуп. Зны-зынла иршьышьыргьы иақәшаҳаҭхалоит.
"Праид" Аацы аргылара хацыркын хәышықәсаҟа раԥхьа. Официалла аҭааҩцәа ашә рзаанартит 2021 шықәса аԥхынразы. Апарк аҿы иҟоуп: алымқәа рхәыҷқәеи дареи, абнацгәы, акамбашьқәа, астраусқәа, пони, аҽқәа, ауасақәа, аҽадақәа, аџьмақәа.