Нанҳәа инаркны излагаз ачашәара шьҭа ахыркәшарахь инеиуеит. Ииашаны ашәарыцара иазнеиуа рзы аамҭа бааԥсхеит, избанзар аԥҟара ақәныҟәара иацәхьаҵуа рацәаҩхеит ҳәа азгәарҭалон ашәарыцацәа лассы-лассы. Иактуалтәума ари азҵаара иахьа уажәраанӡа, ишԥамҩаси ачашәара, ашәарыцара алҵшәақәеи аԥҟарақәеи арадио Sputnik аефир аҟны далацәажәеит Ашәарыцаҩцәеи аԥсыӡкыҩцәеи реидгыла ахантәаҩы Ҳаџьараҭ Кәыҵниа.
Ачашәара аамҭа ахыркәшарахь инеиуеит, сынтәа уиаҟара ирацәамызт ачақәа ҳәа иҳәеит Кәыҵниа.
"Иҳаҩсыз амза 15 рзы хәыҷмаҷқәак аауа иалагеит. Уаанӡагьы ҳныҟәон шәарыцара, аха уиаҟара узыргәырӷьо ҳәа ыҟамызт. Сентиабр азы ауп иаҳа ианырацәаха, жьҭаара акынӡа иаҳа хар амамкәа иҟан. Уаанӡа ашоурақәа бааԥсын, ачақәа шьхала ицон ирацәаны. Ас ашоурақәа аныҟоу, ҩадала ицоит ", - иҳәеит Кәыҵниа.
Ашәарыцаҩцәа сынтәа асоура иазыԥшуп, аӡынра шӡынроу ианцо, усҟан ашәарыцаразы иманшәалоу аамҭоуп ҳәа азгәеиҭеит Кәыҵниа.
"Ҳақәгәыӷуеит ашықәс нҵәаанӡа аҳәыҳә ма ацаблыкь аар, убри хәыҷык ҳгәы ҟанаҵап ҳәа. Алашара аҟамзаара ашәарыцаҩ иԥырхагаӡам, алашара имоур ақыҭахь дцоит. Алашара ҳмоуӡаргьы иҳачҳауеит, аҳәыҳә аар", - ҳәа длафит ашәарыцаҩ.
Аицәажәара инеиҵыхны ишәаҳар шәылшоит аудиофаил аҟны хыхь.