АҞӘА, жьҭаара 17 - Sputnik. Даӷьсҭан амилаҭтә политикеи адин азҵаарақәеи рзы аминистр ихаҭыԥуаҩ Арсен Махмудов напхгара ззиуа аделегациа Аԥсныҟа иааит.
Асасцәа алахәхаран иҟоуп "Гамзатови Аԥсни: амилаҭи ауаатәыҩсеи рыбжьара" ("Гамзатов и Абхазия: от национального к общечеловеческому") захьӡу жәларбжьаратәи афорум.
Аҩаша, жьҭаара 17 рзы асасцәеи Аԥсны ахаҭарнакцәеи ашәҭқәа шьҭарҵеит аԥсуа шәҟәыҩҩцәа Дырмит Гәлиеи Баграт шьынқәбеи рбаҟақәа рҿыԥхьа.
Афорум аусмҩаԥгатә хадақәас иҟалоит жьҭаара 18 рзы Аԥснытәи аҳәынҭқарратә университет аҿи И. Папасқьыр ихьӡ зху Амилаҭтә библиотекаҿи аиԥыларақәа.
Расул Гамзатов - авар поет, апрозаик, апублицист, аиҭагаҩ, асоветтәи урыстәылатәи ауаажәларратә усзуҩ, диит 1923 шықәса цәыббра 8 рзы Даӷьсҭан Хунзахтәи араион Цада аул аҿы аҿы. Иҭрыжьхьеит ипоетикатә, ипрозаикатә, ипублицистикатә шәҟәқәа авар бызшәалеи урыс бызшәалеи, иара убас Даӷьсҭан, Кавказ, адунеи бызшәақәа жәпакы рыла.