Жьҭаара 27 рзы Аԥсны иазгәарҭоит ахатәы бызшәа амш.
Аԥсуа бызшәа амш инадҳәаланы амилаҭтә библиотекаҿы еиҿкаахоит ацәыргақәҵа, раԥхьатәи Анбанқәа рцәыргақәҵақәа ҳәа адырра ҟалҵеит Агрԥҳа. Аҿар ирыздырӡом раԥхьатәи Анбан зеиԥшраз, иагәылоу адаҟьақәа рсахьақәа, уажәтәи излеиԥшым ҳәа нацылҵеит лара.
"Анбан аиҭаҭыжьра амҩа изхысыз иаартны идҳарбар ҳҭахын. Ашәҟәқәа акырӡа зҵазкуа афонд иахыԥхьаӡалоуп. Ацәыргақәҵа аинтерес зызцәырнагаз зегьы иааины иахәаԥшыр ҟалоит. Асааҭ 9:00 инаркны 17:00 иаартызаауеит. Иара убас идырбахоит Миха Лакрба иновеллақәа рыла фильмқәа", – ҳәа лҳәеит Агрԥҳа.
Ашколхәыҷқәа рбызшәа бзиа дырбара, рбызшәа иацәыԥхамшьо, рбызшәала ихәыцуа, арҵаҩцәа рзы ҳацхыраагӡаны ҳхы ҳаԥхьаӡоит ҳәа азгәалҭеит аицәажәараҿы Ареспубликатә библиотека аиҳабы ихаҭыԥуаҩ.
"Ашколхәыҷқәа анааилак абиблиотека афонд дырбахоит, хаҭала, алитература аҟәша. Раԥхьатәи ароманист Иван Папасқьыр имузеи дҳарбар ҳҭахуп. Ажәакала, еиуеиԥшым аусмҩаԥгатәқәа ҳамоуп ҳҿар рбызшәа иацәыԥхамшьо рыҟаҵаразы", – ҳәа лҳәеит Агрԥҳа.
Иаҳа инеиҵыху аиҿцәажәара шәазыӡырҩыр шәылшоит аудиофаил аҿы.