АҞӘА, жьҭаара 23 - Sputnik. Аԥсны ауаҩытәыҩса изинқәа рыхьчаҩ Анас Кьышьмариаԥҳаи никарагуатәи лколлега Дарлинг Риос Мунгиеи русеицура азҵаарақәа ирылацәажәеит. Абри атәы аанацҳауеит аомбудсмен Кьышьмариаԥҳа лсаит.
Кьышьмариаԥҳа лажәақәа рыла, Аԥсны аомбудсмен иусура иахырхарҭа хадақәоу иреиуоуп ареспублика ахьыԥшымра азхазҵаз атәылақәа рҟынтәи рколлегацәа аус рыцура арҿиара.
"Ианышәзыманшәалоу аамҭазы Аԥсныҟа шәнасыԥхьоит. Асасцәа еснагь ҳреигәырӷьоит, аиҳаракгьы иаҳҩызоу атәылақәа рҟынтә", - лҳәеит Кьышьмариаԥҳа.
Анас Кьышьмариаԥҳаи Риос Мунгиеи еилацәажәеит аилибакааразы аиқәшаҳаҭра рыбжьарҵарц. Никарагуатәи аомбудсмен иазгәалҭеит адокументқәа ушьҭантәи реиԥылара иаздырхиарц.
Иара убасгьы аконференциа аҳәаақәа ирҭагӡаны аилибакааразы Амеморандум рнапы аҵарҩит Аԥсни Венесуелеи ромбудсменцәа. Адокумент аҟны иазгәаҭоуп аҩтәылак рыжәларқәа рыбжьара аусеицура арҭбаара шхымԥадатәиу, уи шазырхоу аомбундсменцәа рԥышәа аимдара, рыгәреибагара, Аԥсны аиԥш Венесуелагьы ауаҩы изинқәа рыхьчара аҩаӡара ашьҭыхра.