Аԥсны Аҳәынҭқарратә аҿар ртеатр аус адулара иалагеит Вампилов иҩымҭа "Аԥеиҳабы" иалху ақәыргыламҭа. Уи арежиссиорс иамоу, изалху ари аҩымҭа, аспектакль иалахәу актиорцәеи ароль хадақәа назыгӡараны иҟоуи ртәы арадио Sputnik аефир аҟны еиҭеиҳәеит Аҿар ртеатр аиҳабы Аслан Еныкь.
"Александр Вампилов иҩымҭала аспектакль ақәыргыларазы Урыстәылантә дааҳаԥхьеит арежиссиор Наталиа Николаева. Лара ҳтеатр аҟны ақәыргыламҭақәа ҩба аус рыдылулахьеит, ҳактиорцәа бзианы илдыруеит. Шекспир иҩымҭала "Амбжьах лыбжьареи" Шварц иҩымҭала "Аҳәынҭқар ҟьантази" ықәлыргылеит. Ааигәа иҭҳажьхьан апремиера "Ишьаарҵәырахаз ачара". Иманшәалахеит. Арежиссиор даҳзааит, арольқәа ихәмаруа шьақәлыргылеит шьҭа. Ақәыргыламҭаҟны аҭаацәаратә еизыҟазаашьа аарԥшуп, классикатә ҩымҭоуп. Шьала-дала иузааигәоу иаасҭа уара иутәым иаҳа доуҳала данузааигәахо ыҟоуп. Абри ауп иаарԥшу ақәыргыламҭаҟны", - иҳәеит Еныкь.
Аицәажәара инеиҵыхны ишәаҳар шәылшоит аудиофаил аҟны хыхь.