АҞӘА, жьҭаара 24 - Sputnik, Бадри Есиава. Асабша, жьҭаара 28 рзы Бзыԥҭа ақыҭантәи аҽырҩырҭаҿы имҩаԥгахоит аҽыбӷаҟазаратә спорт азы Аԥсны ачемпионат ҳәа Sputnik иазеиҭеиҳәеит Аҽыбӷаҟазаратә спорт Афедерациа ахада Милор Шәлымба.
"Ачемпионат ҩымш имҩаԥысуеит – жьҭаара 28, 29 рзы. Иалахәхоит ԥшь-командак – Гәдоуҭа, Гагра, Очамчыра араионқәа рҟынтәи, иара убасгьы раԥхьаӡа акәны Риҵатәи амилаҭтә парк акоманда. Ачемпионат изҭаху араион алахәхар ҟалоит. Акомандақәа заҟа ирацәоу аҟара аинтерес аҵалоит", - иҳәеит иара.
Еиуеиԥшым аноурыларала аҽырыҩра, аҽылампыл, аҽырхәмарра, аҵәеигәыдҵа уҳәа реиԥш иҟоу аҽырхәмаррақәа мҩаԥгахоит.
2023 шықәсазтәи ачемпионат азеиԥш аԥхьахәтә фонд иартәоит 1,4 миллион мааҭ. 200 000 мааҭ Риҵатәи апарк иаланагалеит.