АҞӘА, жьҭаара 29 - Sputnik. Голливуд актиор Меттиу Перри иԥсҭазаара далҵит 55 шықәса дшырҭагылаз ҳәа аанацҳауеит РИА Новости, апортал TMZ адыррақәа шьаҭас иганы.
"Азинхьчаратә усбарҭақәа рҿы ишырҳәаз ала, актиор иԥсыбаҩ рбеит асабша, Лос-Анджелес иҩнаҿы... Ишҳарҳәаз ала, иара дӡааҟәырлеит", - ҳәа ануп акьыԥхьымҭаҿы.
Иазгәаҭоуп, ахҭыс ахьыҟалаз аҭыԥ аҿы аполициа анаркотикқәа рышьҭа шамбаз. Актиор аӡәгьы димшьит ҳәа шьақәдырӷәӷәеит.
Меттиу Перри дыхәмаруан 1990-тәи ашықәсқәа рзы зҭыхра иалагаз ауаа ибзианы ирылаҵәаз асериал "Аиҩызцәа" аҟны. Иара ифырхаҵа - асарказм злыжжуа аофис аҟны аус зуа Чендлер Бинг асериал афырхацәа хада дыруаӡәкуп. Уи адагьы, Перри дыхәмаруан акомедиақәа "Уццакцәар — ауаа ухыччоит" ("Поспешишь — людей насмешишь"), "Жә-иардк" ("Девять ярдов"), "Амцҳәаҩцәа" ("Мошенники"), "Х-ҩык ртанго" ("Танго втроем"), "Саб еиҭах 17 ихыҵуеит" ("Папе снова 17"), иара убас еицырдыруа акиноҳамҭақәа "Емми", "Ахьтәы глобус" роуразы дықәдыргылахьан.