АҞӘА, жьҭаара 29 - Sputnik. Константин Ахба "араӡны" даиааит Санкт-Петербург имҩаԥысуаз Урыстәыла зҽаԥсазтәыз азыҟаҵаҩ Леонид Пивоваров игәалашәара иазкыз абокс азы арегионалтә турнир аҿы. Абри атәы аанацҳауеит Аԥсны Аҿари аспорти рзы аҳәынҭеилакы.
Ахба дықәгылоит зыкапан 52 кьыла иҟоу аспортсменцәа рыбжьара. Иара диҵахеит Санкт-Петербург иахаҭарнак Максим Воронцов.
Константин Ахба - Михаил Чачба ихьӡ зху Гәдоуҭатәи аспорттә школ дааӡамҭоуп, 13-14 шықәса зхыҵуа ақәыԥшцәа рыбжьара абокс азы Урыстәыла аԥхьахәгараан аџьаз даиааихьеит. Арҭ аицлабрақәа раан иара Санкт-Петербург иҟоу Аолимпиатә гәыӷрақәа рышкол ахьӡала дықәгылон.