АҞӘА, жьҭаара 30 - Sputnik. Даур Ақаҩба Аԥсны акультура аминистр имаҵура аанижьит. Абри атәы иара ихаҭа иҳәеит и-Telegram-канал аҿы.
"Иахьа инаркны акультура аминистр имаҵура аансыжьуеит даҽа усурак ахь сахьиасуа инамаданы. Ари аамҭа иалагӡаны ҳара иҳалшаз маҷым, аинтерес зҵоу амҩа ду ҳаицанысит. Ахаан исхамышҭуа аԥышәа бзиа соуит, апроект ссирқәа, аибадырра ҿыцқәа ахьыҟаз, еиԥмырҟьаӡакәа џьара ҿыцрак узырҵоз аамҭаны исхызгеит", - иҳәеит иара.
Ақаҩба имаҵура ҿыц арбану имҳәеит.
Уаанӡа ари амаҵура дахагылан Гәдиса Агрба. Иара ихы дақәиҭтәын Аԥсны ахада иҟаиҵаз аусԥҟа инақәыршәаны 2022 шықәса жәабран 11 рзы. Мшаԥы 6 рзы ахада иусԥҟала ари амаҵура дахаргылан Даур Ақаҩба.
Уи аԥхьа Ақаҩба Аԥсны адәныҟатәи аусқәа рминистрс, Ашәарҭадаратә хеилак амаӡаныҟәгаҩ ихаҭыԥуаҩс, иара убас Аԥснытәи аҳәынҭуниверситет жәларбжьаратәи аимадарақәеи аекономикатә зҵаарақәеи рзы апроректорс дыҟан.