АҞӘА, абҵара 1 - Sputnik. 940-ҩык рҟынӡа ахәыҷқәа хабарда ибжьаӡит Газа иахьаҵанакуа, хымчыбжь рыҩнуҵҟала ишьуп 3450-ҩык ҳәа рҳәеит Женева имҩаԥысуаз абрифинг аҿы ЕАР Ахәыҷтәы фонд апресс-маӡаныҟәгаҩ Џьеимс Елдери Еиду амилаҭқәа реиҿкаара Агуманитартә зҵаарақәа русбарҭа ахаҭарнак Иенс Лаеркеи.
"Аҵыхәтәантәи адыррақәа рыла Газа 940-ҩык ахәыҷқәа ыӡны иҟоуп", - ҳәеит Едлер ажурналистцәа дрыҿцәажәо.
Еиду амилаҭқәа реиҿкаара Ахәыҷтәы фонд адыррақәа рыла Израиль имҩаԥнаго ахысрақәа ирыхҟьаны асектор Газа аҿы иҭахахьеит 3450-ҩык ахәыҷқәа, 10 000-ҩык инареиҳаны ишьуп ма ахәрақәа роухьеит. Аиҿкаара адыррала Газа инхо 2,3 миллион рҟынтәи абжаҩык 18 шықәса зхымҵыц роуп.
Жьҭаара 7, ашьыжь асектор Газа аганахь ала Израиль аракетақәа рыла иажәлеит, уи ашьҭахь ХАМАС аибашьцәа атәыла аҳәаа иаԥну араионқәа ирылалеит, ауаа рацәаҩны итҟәаны иргеит. Уи аҭакс ЦАХАЛ аоперациа "Железные мечи" иалагеит. Израильтәи аруаа аҳәаа иаԥну аиланхарҭақәа зегьы хылаԥшра рырҭо иалагеит, анклавгьы ракетала иажәлеит.
Иара убасгьы Тель-Авив аҳәамҭа ҟанаҵеит асектор амацәаз ишҭаркуа, аӡы, афымцалашара, ахәшәқәа, афатә рыҭара шааныркыло азы. Палестина агәабзиарахьчара аминистрра адырра ҟанаҵеит Газа агәабзиарахьчара асистема шеилаҳаз, зыда ԥсыхәа ыҟам ахәшәқәаҵәҟьагьы шазымхо.