Ҭырқәтәыла имҩаԥысит Аԥсуа Федерациа ахантәаҩ ҿыц иалхрақәа. Иҟаз абжьыҭарақәа ирылҵшәаны аԥыжәара игеит Левенҭ Аҭрышба. Абжьыҭара амҩасшьеи, ари ахҭыс иацааиуа аӡбамҭа ҿыцқәеи ртәы арадио Sputnik аефир аҿы еиҭеиҳәеит Аԥснытәи аделагациа алахәыла, Аԥсны Жәлар реизара адепутат Инар Гыцба.
Аԥсуа Федерациа ахантәаҩ ҿыц иалхрақәа раан иқәыргылан х-кандидатурак: Ҳасан Чычба, Левенҭ Аҭрышба, Ерџьаи Ԥачкориа. Аԥсуа культуратә хеидкылақәа рҟынтә абжьыҭара иалахәын 325-ҩык.
Раԥхьаӡа акәны ас еиԥш акандидатцәа рхыԥхьаӡара рацәан, аха зегьы пату еиқәҵарыла имҩаԥысит ҳәа азгәеиҭеит аиҿцәажәараҿы Гыцба.
"Левенҭ Аҭрышба абжьқәа еиҳаны иуоит. Зегьы идырныҳәалеит. Егьырҭ акандидатцәагьы "кыр ҳухәоны ҳҟалозар, ҳувагылоит" ҳәа иарҳәеит. Зегьы рыжәҩыхыр еибыҭаны аусура иазхиоуп", - ҳәа еиҭеиҳәеит Гыцба.
Иаҳа инеиҵыху аиҿцәажәара шәазыӡырҩыр шәылшоит аудиофаил аҿы.