АҞӘА, абҵара 14 – Sputnik. Амузыкатә проект "Apsny Star" ахԥатәи асезон аҩбатәи аконцерт мҩаԥысит Ражден Гәымба ихьӡ зху Аԥснытәи аҳәынҭқарратә филармониаҿы аҩаша, абҵара 14 рзы.
Ари аконцерт уаанӡатәиқәа иреиԥшмызт - алахәцәа ҩыџьа-ҩыџьа еицықәгылон. Ильда Қәычбериаԥҳа лкомандаҟынтәи х-дуетк - Иракли Џьумутиеи Лола Колбаиеи, Адгәыр Лазариеи Рената Хаџьиевеи, Самвел Миракиани Миранда Мархолиаԥҳаи. Ажиури иқәдыргылаз абаллқәеи ирҵаҩы ишылӡбаз алеи апроект аанижьит Адгәыр Лазариа.
Арҵаҩы Фаиа Мархолиаԥҳа лкомандаҟынтәи еицықәгылеит Софиа Миаукинеи Викториа Лабиеи, Кристина Кәыбрааи Сариа Аибеи, Аслан Шьакаиеи Диана Карбашьиани. Аҵыхәтәантәи апроект аанлыжьит.
"Apsny Star" асуперсезон хыркәшахоит ԥхынҷкәын 22 рзы. Апроект аҳамҭа хада - Гнесинаа рыхьӡ зху Амузыкатә академиаҿы хәыда-ԥсада аҵараҵара.
Апроект Аpsny-Star еиҿкаауп Аԥсны акультура аминистрра адгыларала, апроект аспонсор хада - амобилтә еимадара "Аҟәафон". Апроект аинформациатә дгылара анаҭоит аинформациатә маҵзура Sputnik Аԥсны.