АҞӘА, абҵара 15 - Sputnik. Иԥсҭазаара далҵит атлетика хьанҭазы СССР ачемпион, жәларбжьаратәи акласс аспорт азҟаза Руслан Ҭаркьыл ҳәа аанацҳауеит Аԥсны аспорт азы Аҳәынҭқарратә еилакы.
"Алегенда иалиааз, хьӡи-ԥшеи згымыз ҳаспортсменцәа рыԥсҭазаара ралҵра гәыхь дууп. Руслан Расим-иԥа дыздыруаз зегьы рзы дҿырԥшыганы даанхоит. Иара ииааирақәа рҿырԥшала иааӡан аԥсуа ҿар рабиԥарақәа акыр", - ҳәа аҳәоит адырраҭараҿы.
Аштангашьҭыхыҩ, СССР ачемпион, адунеи арекордсмен Руслан Ҭаркьыл диит 1950 шықәса лаҵара 5 рзы Гәдоуҭа араион Дәрыԥшь ақыҭан. 1992-1993 шықәсқәа рзы Аԥсны жәлар Рџьынџьтәылатә еибашьра далахәын, Леон иорден ианашьоуп. Ианашьоуп "Ахьӡ-Аԥша" аорден III аҩаӡара.