АҞӘА, абҵара 15 - Sputnik. Жәларбжьаратәи аолимпиатә еилакы Амилаҭтә олимпиатә еилакқәа ирабжьнагеит Урыстәыла имҩаԥысраны иҟоу Аиҩызаратә хәмаррақәа ирылахәымхарц.Абри атәы аанацҳауеит РИА Новости, Амилаҭтә олимпиатә еилакқәа рымадаразы Жәларбжьаратәи аолимпиатә еилакы адепартамент аиҳабы Џьеимс Маклеод иажәақәа шьаҭас иганы.
Маклеод иазгәеиҭеит амилаҭтә еилакқәа ҳасаб азырур шакәу аспорт аполитикатә цәа иаҳа-иаҳа ишаҟәныло, Урыстәыла аспорттә еицлабрақәа ирылахәхар, уи жәларбжьаратәи асанкциақәа ишырҿагыло.
"Ҳәара аҭахума, Амилаҭтә олимпиатә еилакқәа Адунеизегьтәи аиҩызаратә хәмаррақәа ирылахәхар, 2022 шықәса жәабран 25 рзы Жәларбжьаратәи аолимпиатә еилакы анагӡаратә еилакы Урыстәыла жәларбжьаратәи аспорттә усмҩаԥгатәқәа рымҩаԥгара аганахьала иҟанаҵаз абжьгара иаҿагылоит, уи адагьы, аолимпиатә ҵысра аколлективтә хықәкы - аспорт ахьыԥшымреи автономреи ирҿагылоит", - Маклеод.
Аиҩызаратә хәмаррақәа мҩаԥысраны иҟоуп 2024 шықәса цәыббрамза 15 - 29 рзы Москвеи Екатеринбурги, аԥхьахәтә фонд иартәоит 4,6 миллиард мааҭ. Рыӡбахә ҳәоуп 27 спорт хкы, урҭ рахьтә 22 олимпиатәқәоуп, 5 олимпиатәқәам.
Ахәмаррақәа реиҿкааратә еилакы ахада Алексеи Сорокин иажәақәа рыла, атурнир амҩаԥгара ҵаҵгәыс иамоуп адискриминациа ззырымуа аспортсменцәа злахәу аполитика иахьыԥшым аицлабрақәа ауаажәларра рыхәаԥшыр ахьырҭаху.