АҞӘА, абҵара 16 - Sputnik. Ашықәс ҿыц азы Аԥсныҟа атурқәа рекордтәхеит, ҵыԥх аасҭа акыр еиҳахеит ҳәа аанацҳауеит Урыстәыла атуроператорцәа Рассоциациа.
Аоператор "Интурист" адыррақәа рыла заанаҵтәи аҿаҵарақәа хынтәи бжаки еиҳауп. Ари аҩыза адыррақәа ҟарҵоит егьырҭ аилахәырақәагьы.
"Аҵыхәтәантәи ашықәсқәа зегьы иреиԥшымкәа сынтәа ашықәс ҿыц азы Аԥсныҟа ԥсшьараз аара рҭахуп, иаҿарҵоит аотельқәа. Убри аан иазгәаҭатәуп ишаҿарҵо уаанӡа рацәак иалрымхуаз аотельқәагьы", - ҳәа рҳәеит афирма "Русский экспресс" ахаҭарнакцәа.
Ашықәс ҿыц азы аԥсшьарамшқәа ахьырхырго ҭыԥны Аԥсны аҭаххара азгәаҭо аоператорцәа ирҳәоит ԥхынҷкәынмзазы аҭыԥқәа ҟамлар шалшо. Уажәнатә заанаҵы 70 - 90% номер ҿарҵахьеит.
Аҟазауаа ргәаанагарала асеиԥш аҭагылазаашьа мзызқәаны иамоуп: ахәқәа – Аԥсны аԥсшьара Шәача аасҭа 15-30% ахә лаҟәуп, ашықәс зегьы аус зуа асасааирҭақәеи апансионатқәеи рхыԥхьаӡара арацәахара, аԥсшьаҩцәа рыфатә-рыжәтә аиҿкаара.