АҞӘА, абҵара 16 - Sputnik. Аԥснытәи аспортсмен Елҟан Ӷәазаа атлетика хьанҭазы Урыстәылазегьтәи аицлабраҿы даиааиит ҳәа аанацҳауеит аҿари аспорти русқәа рзы Аҳәынҭқарратә еилакы.
Елҟан Ӷәазаа 67 кьыла рҟынӡа зкапануаз рыбжьара дықәгылон Ҭаҭарсҭан ахьӡала. 124 кьыла иҟаз аштанга ырҭрысны ишьҭихит.
Аспортсмен ииагаз аиааира абҵара 14 рзы зыԥсҭазаара иалҵыз атлетика хьанҭазы СССР ачемпион Руслан Ҭаркьыл игәалашәара иазикит.
Елҟан Ӷәазаа Урыстәыла дачемпионуп, Урыстәыла Ахраҿа ианашьоуп, Урыстәыла ачемпионатқәа рҿы араӡны ҩаӡара имоуп, дрекордсменуп, Урыстәыла аспорт азҟаза ҳәа ахьӡ ихуп.
Уаанӡа аспортсмен Д.И. Чагәаа ихьӡ зху Калдахәаратәи ашкол-интернат атлетика хьанҭа асекциаҿы иҽазыҟаиҵон СССР аспорт азҟаза Иасон Кьахьба инапхгарала. Уажәы Аолимпиатә резерв иатәу Казантәи аҵараиурҭаҿы аҵара иҵоит.