АҞӘА, абҵара 19 - Sputnik. Гал араионтә еизарахь алхырҭатә ҭыԥ №3 аҿы аиҭалхрақәа раан абжьыҭира иалагеит.
Адепутат иҭыԥ ахь ԥшьҩык акандидатцәа ықәгылоуп - Сурам Џьынџьал, Инал Аршба, Роберт Гацерелиа, Ахра Кәакәасқьыр.
Уаанӡа "ГалМедиа" аинтервиу азҭаз Гал Алхратә комиссиа хада ахантәаҩы Џьон Гәлариа ишиҳәаз ала, алхрақәа мҩаԥысуеит араион ахадара ахыбраҿы. Аокруг аҿы иҭаҩуп 192-ҩык ауааԥсыра, урҭ рахьтә 25% алахәхар, алхрақәа шьақәгылеит ҳәа иԥхьаӡахоит.
Арҭ аиҭалхрақәа мҩаԥгатәхеит аус зуа адепутат Алик Бигәаа иԥсҭазаара дахьалҵыз инамаданы. Аиҭалхрақәа абҵара 19 рзы имҩаԥгазааит ҳәа еицҿакрыла иаӡбеит Гал алхратә комиссиа жьҭаара 9 рзы.