АҞӘА, абҵара 21 – Sputnik. Урыстәылатәи аҳазалхыҩцәа Аԥснынтәи Киргизиа аҭиразы закәаншьаҭада автомашьынақәа атәыла ралгара ахсаала аадырԥшит ҳәа аанацҳауеит Краснодартәи аҳазалхырҭа апресс-маҵзура.
24-шықәса зхыҵуа урыстәылауаҩ аҳазалхырҭаҿ аԥаршеи документқәа цәыригеит – аԥснытәи аилахәыраҿ амашьынарныҟәцаҩс аус иуашәа, автомашьына BMW-X5 Урыстәыла аҵакырахь апассаџьырцәа рымҩангаразы ииаигошәа. Абри ала иара аҳазатә шәара иҽацәхьеикит.
Ахаҵа амашьына аҳәаа иахыганы ари аус ицҟазҵоз ириҭеит. Ари азы иара аԥара изыршәеит. Уи алагьы абиуџьет иалагалам аҳазатә шәарақәа 2,3 миллион мааҭ инаӡеит.
Аҳазатә шәара аҽацәхьакразы ашьаус хацыркуп.