АҞӘА, абҵара 22 - Sputnik. Азинхьчаратә усбарҭақәа русзуҩцәа Гәдоуҭа араион Мгәыӡырхәа ақыҭа анхаҩы Игорь Арӡынба 32 грамм амарихуана имырхит ҳәа аанацҳауеит Аԥсны АҩАР апресс-маҵзура.
31 шықәса зхыҵуа Арӡынба анаркотикатә маҭәашьар иҩны иҵәахны иман асаркьа банка иҭаҵаны.
Иаанкылоу иганхьала ашьаус хацыркуп, иара гәҩарас дрымоуп аҭира хықәкыс иҟамҵакәа анаркотик рацәаны аахәареи аҵәахреи рзы. Аӡбарҭа Игорь Арӡынба атәыла дшалымҵуа азы инапы ақьаад иаҵадырҩит.