АҞӘА, абҵара 22 – Sputnik. Дарбанзаалак Аԥсны атәылауаҩ азинеилагара ҟазҵо дахьырхәхоит ҳәа аҳәамҭа ҟаиҵеит Аԥсны аҩнуҵҟатәи аусқәа рминистр Роберт Кьиут.
Иара агәҭынчымра ааирԥшит Афон ҿыц иаха аҳәынҭдача агәараанда еимыхны иҭалаз. Иара иазгәеиҭеит, Аконституциа инақәыршәаны, Аԥсны атәылауаа азин шрымоу ауаажәларразы акрызҵазкуа азҵаарақәа рықәҿыҭра, аха абас акәым уи шыҟаҵатәу ҳәа.
"Ажәлар рус ргәы иҵхошәа ҟаҵаны хаз игоу гәыԥҩык ауаа рхатә интересқәа ишрышьҭоу умбар залшом. Урҭ роуп Афон ҿыц иҟалаз ахҭыс зырцыхцыхуа", - иҳәеит аминистр.
Кьиут иазгәеиҭеит ҳуаажәларра арҭ рҩызцәа аҭагылазаашьақәа шхьаарго, иагьшырҭаху атәылаҿы еицырдыруа ауаа ари аус ҭакԥхықәрала иазныҟәарц, изықәнагоугьы аус иақәдыршәарц.
Афон ҿыц ауааԥсыра гәыԥҩык аҳәынҭқарратә дача "Афон ҿыц" аҵакыра мчыла иҭалеит аҩаша, асааҭ 21:00 шыҟаз. Дара адача аҵакыра аанда ахәҭак амхны ахыбра иакәшаны игылт, уи аҭира азин аӡәгьы ишимам атәы ҳәо.
Аҳәынҭдачақәа русбарҭа аиҳабы Беслан Кәыҵниа имцуп ҳәа ахиҳәааит аҳәынҭдача "Афон ҿыц" рҭиуеит ҳәа игәараҵоу ажәабжь. Иҳәеит ари аҩыза аинформациа зрыладырҵәо апровокациатә политикатә акциа амҩаԥгаразоуп ҳәа.